Amasu othisha okufundisa ukukwazi ukufunda nokubhala ngesizulu ulimi lwasekhaya emabangeni elokuqala nelesibili, ezikoleni ezikhethiwe zaseNtuzuma naseNanda Ethekwini, Kwazulu-Natali.
Loading...
Date
2021
Authors
Journal Title
Journal ISSN
Volume Title
Publisher
Abstract
Lolu cwaningo lubika ngamasu othisha bamabanga elokuqala nelesibili okufundisa ukukwazi ukufunda nokubhala ngolimi lwaseKhaya isiZulu. Ucwaningo lolu olobunjalo botho ngaphansi kwendlelakubuka yomhumusho. Indlela yokuqoka abahlanganyeli esetshenzisiwe kube eyokuqoka okunenhloso. Abahlanganyeli kwaba wothisha abayisithupha abavela ezikoleni eziyisithupha zaseThekwini eNtuzuma naseNanda ezingaphansi kwesiYingi sasePhayindane, KwaZulu-Natali. Izindlela zokukhiqiza imininingo yocwaningo kwaba yinhlololwazi esakuhleleka, ukubukela othisha befundisa emakilasini kanye nokuhlaziya imiqulumbhalo okwasiza ekutholeni ulwazi olujiyile nolunohlonze, futhi kwandisa ubuqiniso
nokukholeka kocwaningo. Ekuhlaziyeni ulwazi engalukhiqiza ngasebenzisa izindlela zokuhlaziya zocwaningo lobunjalo botho. Imiphumela yocwaningo ngayihlaziya ngisebenzisa injulalwazi kaBernstein Inkulumongxoxo Yokufundiswa Kwezingane, kanye nemicabangonzulu eyizindlelande zokufundisa ukukwazi ukufunda nokubhala. Imiphumela yocwaningo iveze ukuthi othisha bantula ulwazi-mbe lokufundisa ukukwazi ukufunda nokubhala emabangeni ayisisekelo semfundo. Lokho kumbandakanya insweleko yolwazi lwezinjulalwazi zokuthola nokufundisa ulimi ezisekela iminyakazo yabo emakilasini, ulwazi lwezindlela nezindlelande kanye nolwamasu okufundisa ukukwazi ukufunda nokubhala.
Ukwentuleka kolwazi lokufundisa kothisha kungumphumela wokuntuleka koqeqesho lothisha oluqhubekayo lokufundisa ukukwazi ukufunda nokubhala emabangeni elokuqala nelesibili, befundisa ngolimi lwabafundi lwaseKhaya isiZulu. Lokhu kudala inkinga eseyabonakala emazingeni onke emfundo eyisisekelo yabafundi abangakwazi ukufunda nokubhala. Kuwo wonke amabanga abafundi badluliselwa emabangeni alandelayo bengenalo ulwazi lokufunda nokubhala lwebanga abakulo, nokugcina kwehlisa amazinga okuphasa kwabafundi okugqama kakhulu kuMatikuletsheni. Ngakho lolu cwaningo luzohlomulisa othisha abafundisa isiZulu ulimi lwaseKhaya, izazimfundo eziqeqesha othisha, abaqambi bezinqubomgomo zolimi kwezemfundo kanye nabacwaninga ngokuthola nokufundisa ulimi
nokukwazi ukufunda nokubhala emabangeni emfundo ayisisekelo.
Description
Masters Degree. University of KwaZulu-Natal, Durban.