Ucwaningo ngokufundiswa kwekhono lokubhala esiZulwini ulimi lwesibili emabangeni asukela kwelesi-4 kuya kwelesi-6 esiyingini-UGU.

Abstract

Ukufundiswa kwesiZulu uLimi lwesiBili eNingizimu Afrika kuhlobene nokusetshenziswa kwendlela yokuxuba izilimi phakathi kolimi lwesiZulu nolimi lwesiNgisi ezikoleni ezazilandela inqubo yokufundiswa kwezilimi zamaKoloni kuphela phambilini. Inkolelo yothisha ukuthi ulimi lwesiNgisi olusezingeni likazwelonke lwenza abafundi baluqonde kangcono ulwazi abafundiswa lona esiZulwini uLimi lwesiBili. Ucwaningo lubheka ukufundiswa kwekhono lokubhala esiZulwini uLimi lwesiBili emabangeni asukela kwelesi-4 kuya kwelesi-6. Ucwaningo luhlose ukuthola ulwazi nokuqonda othisha abanakho, luphinde luphenye ngenqubo othisha abayilandelayo ekilasini kanye nezizathu abasekela ngazo inqubo abayilandelayo ekufundiseni ikhono lokubhala esiZulwini uLimi lwesiBili emabangeni asukela kwelesi-4 kuya kwelesi-6. Ucwaningo ngilwenze esikoleni esisodwa esasilandela inqubo yokufundiswa kwezilimi zamaKoloni kuphela phambilini esitholakala esifundazweni saKwaZulu-Natal esiYingini-uGu edolobheni laseSayidi. I-Ekukhanyeni Primary School okuyisikole ekucwaningelwe kusona yakhelwe imiphakathi yabantu bobuhlanga obungafani abakhuluma izilimi ezingafani, sinothisha kanjalo nabafundi bobuhlanga obungafani abakhuluma izilimi ezingafani. Imininingo engiyikhiqizile e-Ekukhanyeni PS ihlaziywe ngesibuko senjulalwazi kaKrashen (1981), i-Second Language Acquision Theory eyethula iziHlawumbiselo ezinhlanu mayelana nokuthola uLimi lwesiBili. Lolu wucwaningo lwegaqa ngoba lubheka inqubo eyodwa ebumbene. Ocwaningweni kulandelwe indlelakubuka yomhumusho ngenhloso yokuthola ulwazi olungamaqiniso ngisebenza ngothisha bekunzikandaweni wasesikoleni. Ocwaningweni kulandelwe nendlelande yocwaningo lobunjalo botho ngenhloso yokubheka ukuxhumana kwezimo ezenzekayo ngokwemvelo ekilasini uma kufundiswa ikhono lokubhala esiZulwini uLimi lwesiBili emabangeni 4-6. Kukhiqizwe imininingo yocwaningo ngezindlela ezihlobene nendlelande yocwaningo lobunjalo botho ezibandakanya inhlololwazi esakuhleleka eyenziwe kothisha abane abafundisa isiZulu uLimi lwesiBili emabangeni asukela kwelesi-4 kuya kwelesi-6 e-Ekukhanyeni PS. Kusetshenziswe nendlela yemibuzo evulekile enhlololwazini esakuhleleka eyenziwa kothisha. Imininingo yocwaningo ikhiqizwe nangokubukela izifundo zothisha kanye nangokuhlaziya imiqulumbhalo. Kuphinde kwabuyekezwa nolwazi olwethulwa yimibhalo yocwaningo eshicilelwe mayelana nokufundiswa kwekhono lokubhala oLimini lwesiBili. Izingqinamba ezitholakele ocwaningweni zibandakanya ukungasetshenziswa kwamasu nezindlela ezibhekelela wonke umfundi ekilasini ukuba athole ikhono lokubhala ngokuphumelela. Lokho kungenxa yokufundiswa koLimi lwesiBili emabangeni asukela kwelesi-4 kuya kwelesi-6 okwenziwa othisha abangakuqeqeshelwanga ukufundisa uLimi lwesiBili futhi nabangakuqeqeshelwanga ukufundisa amabanga (4-6). Enye imbangela ubuningi bolwazi lokuqukethwe okuhlelwe isikhathi esincane ukuba kufundiswe ekilasini esifundweni sesiZulu uLimi lwesiBili emabangeni (4-6). Okungaba yisisombululo ukuthi othisha baqinisekise ukuhlela nokusebenzisa uhlelo lwesifundo oluqondene ngqo nesifundo sosuku esiZulwini uLimi lwesiBili ukuze bethule isifundo ngendlela ehlosiwe futhi ehlolisisiwe. Inhloso yocwaningo ukuba ulwazi lweziphakamiso lube usizo nakwabanye othisha kwabanye onzikandaweni.