Izindlela namasu okuthuthukisa ikhono lokucabanga kusetshenziswa imibhalo yobuciko emakilasini esiZulu ulimi lokuqala lokwengeza ebangeni le-10 nele-11.

Abstract

Lolu cwaningo lubheka izindlela namasu okuthuthukisa ikhono lokucabanga ngokujula kusetshenziswa imibhalo yobuciko emakilasini esiZulu uLimi Lokuqala Lokwengeza ebangeni le-10 nele-11. Lolu wucwaningo oluyikhwalithethivu nolwesimo olusebenzise ipharadaymu yomhumusho. Kulolu cwaningo ngisebenzise indlela yokuqoka ngenhloso ababambiqhaza abangothisha abayisithupha abafundisa isiZulu uLimi Lokuqala Lokwengeza ezikoleni ezintathu esifundeni saseKing Cetshwayo. Lapha kusetshenziswe izindlela ezine ukukhiqiza imininingo; okuyizingxoxo ezisakuhleleka, izingxoxo zamaqembu, ukwethamela izifundo nokuhlaziya amadokhumenti, okungamalungiselelo ezifundo. Imininingo ekhiqiziwe ihlaziywe yaphinde yahlelwa ngokwezindikimba. Imiphumela yalolu cwaningo ihlaziywe kusetshenziswa injulalwazi kaVygotsky (1978) yeSocial constructivism. Injulalwazi yeSocial constructivism igcizelela ukuthi imfundo ingunxantathu, ulwazi lwakheka ngokusebenzisana phakathi kwabafundi bebodwa, phakathi kwabafundi nothisha naphakathi kwabafundi nomphakathi. Ngokwemfundo engunxantathu abafundi bangathuthukisa ikhono labo lokucabanga ngokujula kanye nelokuqamba imibhalo ngokuthi basebenzisane nabanye abafundi, basebenze ngabodwana, basebenzisane nothisha babuye basebenzisane nomphakathi abaphila kuwona. Iphinde igcizelele ukuthi abafundi basebenzisa ulwazi lwangaphambilini ukwakha ulwazi olusha. Imiphumela yocwaningo iveze ukuthi othisha basebenzisa izindlela namasu anhlobonhlobo ukuthuthukisa ikhono lokucabanga ngokujula kanye nelokuqamba imibhalo kubafundi bebanga le-10 nele-11. Izindlela ezigqamile ezisetshenziswa ngothisha ukuthuthukisa ikhono lokucabanga ngokujula kanye nelokuqamba imibhalo uma befundisa imibhalo yobuciko yilezi: indlela yokucabanga ngokusheshayo, indlela yokusebenzisa izingxoxo, indlela yokucula amaculo, indlela yokulingisa, indlela yokuxoxa izindaba, indlela esekelwe olimini, indlela yokuchaza, indlela esekelwe olwazini, indlela yokuzindla ngokucabanga, indlela yokufundisa izimo zokuziphatha kanye nendlela yokuhlaziya amakhono. Amasu asetshenziswa ngothisha ukuthuthukisa ikhono lokucabanga ngokujula kanye nelokuqamba imibhalo yilawa: isu lokusebenza komfundi ngayedwana kanye nesu lokusebenzisana. Imiphumela yalolu cwaningo ikuvezile ukuthi nakuba othisha besebenzisa izindlela kanye namasu ahlukahlukene okufundisa, kusekhona okushodayo nokusafanele kuqashelwe. Imiphumela iveze ukuthi othisha badinga ukuba uMnyango wezeMfundo Eyisisekelo ubaseke uphinde ubaqeqeshe ngezinsizakufundisa. Othisha babuye babhekane nenkinga yokuthi abafundi banokuxuba ulimi lwesiZulu kanye nolwesiNgisi uma bephendula imibuzo noma kuxoxwa emakilasini. Lokhu kungumthelela wokuthi isiNgisi siqhakanjiswa kakhulu ezikoleni nasemakhaya. Ukusetshenziswa kwezindlela namasu ahlukene ngothisha besiZulu uLimi Lokuqala Lokwengeza kuletha ithemba lokuthi abafundi bazogcina bekwazile ukukhuluma isiZulu ngendlela efanele bangasixubi nolimi lwesiNgisi. Lokhu ngikusho ngoba izindlela namasu asetshenziswa ngothisha ukuthuthukisa ikhono lokucabanga ngokujula kanye nelokuqamba imibhalo kukhuthaza abafundi ukuba bakwazi ukuzithathela izinqumo ngemfundo yabo futhi bakwazi ukubhekana nezinselelo zempilo yomhlaba njengoba sesiphila esikhathini soguquko lwesine. Ngakho-ke, ngiphakamisa ukuthi othisha basebenzise izindlela namasu ahlukahlukene ukuthuthukisa ikhono lokucabanga ngokujula kanye nelokuqamba imibhalo kubafundi besiZulu uLimi Lokuqala Lokwengeza.